Директорот на Дирекцијата за ТИРЗ, Гоце Димовски како дел од владината делегација предводена од министерот за економија и труд, Бесар Дурмиши, придружуван од надворешниот советник на претседателот на владата, Владимир Пешевски, денес учествуваа на првиот инвестициски форум на ЕУ и Западен Балкан кој се одржува во Тирана, Албанија.
Настанот беше отворен од Урсула фон дер Лајен, претседателката на Европската комисија и Еди Рама, премиер на Република Албанија. Како стратешки чекор кон економската интеграција на регионот со Европската Унија, форумот претставува можност за поттикнување на странски директни инвестиции, поттикнување на иновациите и забрзување на економската конвергенција.
Димовски за време на форумот оствари повеќе билатерални средби со високи претставници од соседните земји и Европа, како и со потенцијални инвеститори. Тој го посочи моделот за инвестирање кој го нуди Македонија како атрактивна дестинација за странските компании, истакнувајќи ги постојаните напори на Дирекцијата и Владата за што поголем економски раст.
Овој прв инвестициски форум од ваков вид е стратешка платформа за зајакнување на економската соработка, привлекување странски директни инвестиции и забрзување на интеграцијата на економиите на Западен Балкан во единствениот европски пазар, од што ќе имаат корист и земјите од Западен Балкан, земјите-членки на ЕУ и европските компании.
