Бугарија доби зелено светло од лидерите на Европската Унија за воведување на еврото како официјална валута од 1 јануари 2026 година.
Одлуката беше донесена на самитот на ЕУ во Брисел, каде што европските лидери ја поддржаа препораката на Европската комисија – со што Бугарија ќе стане 21-та членка на Еврозоната и ќе го замени левот со евро. Првичниот план беше тоа да се случи уште во 2024 година, но тогашната апликација беше одбиена.
Бугарија, членка на ЕУ од 2007 година, е првата балканска земја која ќе го воведе еврото по Хрватска, која тоа го направи во 2023 година. Пред да стане официјално, потребни се уште консултации со Европскиот парламент и Европската централна банка, како и формални законски измени – чекори кои се сметаат за рутина.
И покрај економскиот напредок, Бугарија и натаму е меѓу најсиромашните земји во Унијата според бруто-домашниот производ по жител. Сепак, економскиот раст последниве години е меѓу највисоките во ЕУ.
Иако Бугарија исполнува значаен дел од критериумите – како стабилна инфлација, стабилен курс и здрави јавни финансии – дел од населението изразува скепса кон замената на валутата.
Европската комисија прогнозира дека инфлацијата ќе се намали на 3,6% во тековната година, а на 1,8% во 2026 – што беше еден од клучните фактори за позитивната одлука на Брисел.
