Американското Министерство за финансии денеска воведе санкции за српската нафтена индустрија, како дел од новиот пакет насочен кон фирми во сопственост на руски компании.
Според објавата на веб-страницата на американското Министерство за финансии, бројни компании во Русија и во странство од денес се под санкции, вклучително и НИС, која од 2008 година е во сопственост на руската национална компанија Гаспром.
Во образложението се наведува дека санкциите се воведени за компании поврзани со Гаспром, а покрај НИС има и подружници на Гаспром во Казахстан, Киргистан, Луксембург и Таџикистан.
Сите имоти на овие компании, како и на другите подружници и партнери на Гаспром во Русија кои се на оваа листа, која се наоѓа во САД, се запленети, а санкциите носат и други последици кои конкретно не се наведени во ова соопштение.
Вреди да се додаде дека санкциите се донесени во согласност со Извршните наредби 14024 и 13662, издадени од Џо Бајден и Барак Обама.
Овие прописи им дозволуваат на властите во Вашингтон да ги санкционираат компаниите кои „директно или индиректно ја поддржуваат руската економија“, а беа донесени по анексијата на Крим, а подоцна и отворената агресија на земјата против Украина.
