Ворен Бафет донираше акции вредни 5,5 милијарди долари на хуманитарните фондации на своите деца

Американскиот милијардер Ворен Бафет најави дека ќе донира акции на својата компанија Berkshire Hathaway во вредност од околу 5,5 милијарди долари на четири добротворни фондации поврзани со неговите три деца. Ова е повеќе од четири пати поголема донација од оние што ги правел во ноември во претходните години, објави Асошиејтед прес.

Бафет донираше вкупно 9.225.000 акции од класата Б на Berkshire Hathaway. Од нив, 3.690.000 акции ќе добие фондацијата Susan Thompson Buffett, додека фондациите Sherwood, Howard G. Buffett и NoVo ќе добијат по 1.845.000 акции.

При отворањето на берзата во понеделникот, една акција од класата Б вредела 594 долари.

Донацијата е дел од долгогодишниот план на Бафет постепено да го подари целото свое богатство. Неговата цел е до 2034 година да ги донира сите свои акции во четирите фондации, при што вредноста на годишните донации треба постепено да се зголемува.

Милијардерот истакна дека има целосна доверба во своите деца, кои со децении внимателно избираат проекти и организации за поддршка.

„Добрината се зголемува како камата“, напиша Бафет, потсетувајќи се на луѓето кои му помагале во животот без да очекуваат ништо за возврат. Тој ги повика луѓето за Денот на благодарноста да им се заблагодарат на несебичните личности во својот живот, но и самите да направат нешто добро за другите.

Каде ќе завршат милијардите?

Четирите фондации поддржуваат различни општествени цели.

Фондацијата Susan Thompson Buffett, именувана по неговата прва сопруга, поддржува организации кои работат во областа на репродуктивното здравје во САД и во светот.

Фондацијата Sherwood, која ја води неговата ќерка Сузи, со години финансира програми за образование и развој во раното детство во САД.

Фондацијата Howard G. Buffett, поврзана со неговиот син Хауард, најголем дел од средствата ги насочува кон безбедноста на храната и спречувањето конфликти во светот, а во последниот период и кон Украина.

Четвртата фондација, NoVo, ја водат неговиот син Питер Бафет и неговата сопруга Џенифер, а нејзината работа е насочена кон поддршка на жените и девојчињата ширум светот.

Фондацијата на Бил Гејтс повеќе нема да добива донации

Бафет со години беше еден од најголемите донатори на Фондацијата на Бил и Мелинда Гејтс, но годинава објави дека таа повеќе нема да добива средства од неговите идни донации.

Тој објасни дека одлуката првенствено произлегува од довербата во способностите на неговите деца да продолжат со филантропската работа, а не од поврзаноста на Бил Гејтс со осудениот сексуален престапник Џефри Епстин.

Ова е прва донација на Бафет по неговото повлекување од функцијата претседател и извршен директор на Berkshire Hathaway, конгломерат вреден повеќе од еден билион долари, кој самиот го изгради.

Тој нагласи дека неговата доверба во компанијата останува непроменета. Berkshire Hathaway во третиот квартал откупила сопствени акции во вредност од 9,6 милијарди долари, додека нејзините огромни парични резерви повторно почнале да растат.

Поврзани вести

Останете поврзани
36,851фановикако
12,358следбенициследете
Последни написи