Клиентите на неколку од најголемите американски банки пријавиле проблеми со пристапот до своите сметки преку интернет, а прекините предизвикаа голем број реакции на социјалните мрежи.
Според податоците на веб-страницата Downdetector, која ги следи прекините во работата на онлајн услугите врз основа на пријави од корисниците, проблемите со банката Chase започнале околу 15:53 часот по локално време. До 17:04 часот повеќе од 2.000 корисници пријавиле тешкотии, а американскиот портал GV Wire подоцна објавил дека бројот на пријави се приближил до 10.000.
Најголем дел од корисниците се пожалиле дека не можат да се најават на своите сметки преку веб-страницата. Околу 18 часот, 43 отсто од пријавите поврзани со Chase се однесувале на проблеми со најавувањето, додека 24 отсто се однесувале на прикажувањето на состојбата на сметките.
Проблеми со онлајн банкарството пријавиле и клиенти на Bank of America и U.S. Bank. На социјалните мрежи се споменувала и Wells Fargo, но засега нема поконкретни податоци за проблемите со оваа банка.
Тешкотии биле пријавени и со Zelle, сервисот за испраќање пари во сопственост на неколку од најголемите американски банки. Според пишувањето на IBTimes, корисниците не можеле ниту да испраќаат ниту да примаат пари, а дел од плаќањата не биле реализирани.
Ниту Zelle ниту компанијата Early Warning Services, која управува со сервисот, не потврдиле дека има прекин во работата.
До 18 часот Chase немаше објавено соопштение за причините за проблемите, ниту информации кога услугите би можеле повторно да функционираат нормално.
Проблемите се одразиле и на берзата. Акциите на Bank of America, Citigroup, Wells Fargo и JPMorgan Chase забележале пад од околу два отсто, објави Yahoo Finance.
