Авионскиот сообраќај во САД главно се врати во нормала по тридневниот хаос во кој беа откажани повеќе од 18.000 летови. Станува збор за најголемиот прекин во американскиот воздушен сообраќај во последните 25 години, а првичните процени покажуваат дека економските последици би можеле да достигнат неколку милијарди долари.
Проблемите започнаа во петокот, кога прекин во комуникацискиот систем на контролата на летање предизвика речиси целосен застој на воздушниот сообраќај во земјата во период подолг од четири часа. Како можна причина се наведува дефект на еден рутер, инсталиран за време на редовно одржување на системот.
Според податоците на платформата FlightAware, до понеделник во 13:30 часот по источноамериканско време биле откажани 330 летови, додека околу 3.000 доцнеле. Тоа е значително подобрување во споредба со неделата, кога биле откажани повеќе од 2.300 летови, а околу 11.000 доцнеле.
Американскиот министер за транспорт Шон Дафи процени дека финансиските последици од нарушувањата ќе изнесуваат милијарди долари. Според процените на брокерската куќа Bernstein, четирите најголеми американски авиокомпании би можеле заедно да изгубат околу 345 милиони долари приходи поради прекинот.
Застарена технологија во контролата на летање
Инцидентот повторно го отвори прашањето за состојбата на американската инфраструктура за контрола на воздушниот сообраќај. Федералната управа за воздухопловство (FAA) сè уште користи застарена опрема, меѓу која компјутери на Compaq, дискети, рутери стари 25 години и хартиени ленти за следење на авионите.
Американскиот претседател Доналд Трамп оцени дека е неопходно значително финансирање за модернизација на системот, посочувајќи дека постојната опрема е застарена и подложна на сериозни дефекти.
Министерот Дафи го зголеми барањето за средства за модернизација на контролата на воздушниот сообраќај и аеродромите од 30 на 50 милијарди долари.
Републиканскиот сенатор Ерик Шмит оцени дека инвестициите требало да бидат реализирани многу порано, бидејќи проблемите се таложеле со децении.
Од друга страна, демократите во Конгресот го критикуваат Министерството за транспорт поради бавното трошење на веќе одобрените средства. Од првично предвидените 12,5 милијарди долари за контролата на воздушниот сообраќај, досега биле потрошени само една милијарда долари.
Министерството одговорило дека плановите за користење на поголемиот дел од средствата се финализирани, но дека се потребни дополнителни инвестиции, особено во телекомуникациската инфраструктура.
Демократите бараат и конгресно сослушување за да се утврдат причините за прекинот, додека Дафи и републиканците се залагаат за брзо одобрување на дополнителното финансирање.
