Работниците во Хрватска, наскоро би можеле да ја дознаат платата уште пред разговорот за работа, но и да побараат податоци за просечните примања на колегите кои работат на исти или слични работни места.
Ова е предвидено со измените на хрватскиот Закон за работни односи, кои се на јавна расправа до 2 декември 2026 година.
Измените ги претстави хрватскиот министер за труд Ален Ружиќ, а новите правила за транспарентност на платите ги објасни Анита Зирдум од Управата за труд и заштита при работа. Со законските измени Хрватска ја внесува во своето законодавство европската директива за транспарентност на платите, чиј рок за примена истече на 7 јуни годинава.
Платата ќе мора да биде позната пред разговорот за работа
Според новите правила, секој кандидат за вработување ќе мора да добие информација за почетната плата или за распонот на плата за работното место, пред разговорот за работа или најдоцна за време на интервјуто.
Работодавците повеќе нема да смеат да ги прашуваат кандидатите колкава плата добивале на претходното работно место.
Вработените, пак, ќе имаат право да побараат информации за сопствената плата, како и за просечните примања на колегите кои извршуваат исти или слични работни задачи. Податоците ќе мора да бидат прикажани одделно за мажите и жените.
За да се овозможи ова, работодавците ќе треба да утврдат платни разреди за секое работно место. Доколку одбијат да ги достават бараните информации, може да бидат казнети за прекршок.
Сепак, новите правила не значат дека секој работник ќе има право да ја дознае точната плата на конкретен колега. Целта е да се обезбеди транспарентност и да се овозможи споредба на примањата, а не откривање на индивидуалните плати.
Одредбите во договорите за работа со кои на вработените им се забранува да зборуваат за сопствената плата ќе станат ништовни. Поради тоа, нема да биде потребно да се менуваат постојните договори.
Се воведува национален систем за транспарентност на платите
Со измените се предвидува и воспоставување Национален систем за транспарентност на платите, за кој ќе биде задолжена Финансиската агенција ФИНА.
Поголемите работодавци преку овој систем ќе доставуваат извештаи за разликите во платите меѓу мажите и жените. За приспособување на новите правила ќе имаат најмалку шест месеци од стапувањето на законот во сила.
Промени и кај користењето на годишниот одмор
Измените на Законот за работни односи предвидуваат и нови правила за пренесување на неискористениот годишен одмор.
Општото правило останува исто: неискористениот одмор од претходната година треба да се искористи најдоцна до 30 јуни.
Меѓутоа, работниците кои не можеле да го искористат одморот до тој рок поради болест, родителски права или други оправдани причини, ќе можат да го искористат до 31 декември.
Доколку и тогаш не се во можност да го искористат поради болест, рокот ќе биде продолжен за дополнителни три месеци, согласно со пресудите на Судот на Европската Унија.
