Германскиот канцелар Фридрих Мерц изјави дека мигрантите од исламските земји кои не ја прифаќаат историската одговорност на Германија за холокаустот мора да ја напуштат земјата. Тој ова го порача на прием за еврејски спортисти, кои се пожалиле дека се плашат јавно да носат обележја со Давидовата ѕвезда.
Мерц зборувал во петокот во Канцеларијата на германскиот канцелар во Берлин, на прием организиран за освојувачите на медали од овогодинешните Макaбијски игри.
„Историската одговорност на нашата земја подеднакво се однесува и на оние кои доаѓаат во Германија од исламските земји. Секој што не го почитува тоа мора да ја напушти нашата земја“, изјавил Мерц.
Според извештаите од настанот, изјавата уследила откако тренер на кошаркарскиот тим му кажал на канцеларот дека неговите играчи се плашат јавно да ги носат репрезентативните јакни на кои има Давидова ѕвезда.
Мерц се повикал на говорот што поранешниот германски претседател Рихард фон Вајцзекер го одржал во Бундестагот во 1985 година. Тогаш Вајцзекер истакнал дека младите Германци не се виновни за холокаустот, но се одговорни за последиците што ги оставил.
„Тоа се однесува на целото германско општество. А со оглед на актуелните околности, би додал дека ова важи и за имигрантите кои доаѓаат во Германија“, рекол Мерц, додавајќи дека овие принципи ги смета за непроменливи.
