Владата на канадскиот премиер Марк Карни во четвртокот во Отава го претстави новиот буџет, чија главна цел е зајакнување на домашната економија и намалување на зависноста од Соединетите Американски Држави, во услови на трговската војна што ја води американскиот претседател Доналд Трамп.
Буџетот, насловен „Господари на сопствената судбина“, предвидува 142,1 милијарда канадски долари, односно 101,6 милијарди американски долари, за повеќегодишни расходи и даночни олеснувања.
Мерките вклучуваат поттикнување на инвестициите, како и милијарди долари за енергетиката, инфраструктурата и културата.
Канадската влада планира вкупни расходи од 603 милијарди канадски долари, односно 431 милијарда американски долари, и буџетски дефицит од 62,3 милијарди канадски долари, или 44,5 милијарди американски долари, за фискалната 2026/2027 година.
Тоа е за три милијарди канадски долари помалку од прогнозата објавена во април.
Според податоците на Меѓународниот монетарен фонд наведени во буџетот, вкупниот дефицит на федерално, провинциско и локално ниво во Канада изнесува 2,5 отсто од економијата, во споредба со 8,5 отсто во САД.
Во буџетскиот документ се наведува дека „Соединетите Американски Држави го менуваат глобалниот трговски поредок“.
Буџетот беше претставен два дена по победата на демократите на американските избори на средината од претседателскиот мандат, што дополнително ја ослабна политичката позиција на Трамп, во период кога двете земји разгледуваат можност за нов трговски договор.
Канадската влада очекува трговската војна на Трамп да го забави економскиот раст кон крајот на оваа и почетокот на следната година. Според прогнозите, канадската економија ќе порасне за само 1 отсто во 2026 година и 1,7 отсто во 2027 година.
Едно од најзначајните даночни олеснувања ќе им овозможи на компаниите веднаш да ги одбиваат квалификуваните инвестиции од даночната основа. Со тоа, ефективната даночна стапка за новите инвестиции во Канада би се намалила на 6,4 отсто, што е помалку од половина од споредливата стапка во САД.
Се проценува дека оваа мерка ќе ја чини државата 36 милијарди канадски долари, односно 25,7 милијарди американски долари, во период од пет години.
Карни, поранешен гувернер на Централната банка на Канада и на Банката на Англија, има амбициозна цел – да го удвои канадскиот извоз надвор од американскиот пазар до 2035 година и да ги зајакне економските врски со Европа и Азија.
Буџетот предвидува и формирање на првиот национален државен инвестициски фонд на Канада, вреден 25 милијарди канадски долари, односно 17,9 милијарди американски долари. Фондот ќе инвестира во канадски компании и големи инфраструктурни и развојни проекти.
Дополнително, предвидени се 7,7 милијарди канадски долари, или 5,5 милијарди американски долари, за зајакнување на домашната одбранбена индустрија. Целта е 70 отсто од воените договори да им бидат доделени на канадски компании.
Канада наведува дека е на пат до 2035 година да ја исполни целта на НАТО за издвојување 5 отсто од БДП за одбраната и безбедноста, иако овие трошоци не се целосно опфатени со новиот буџет.
Канада во август се повлече од трговските преговори со САД поради американските барања, за кои Карни оцени дека го загрозуваат канадскиот суверенитет и заштитата на националната култура.
