Рускиот вицепремиер Александар Новак изјави дека Москва е подготвена да испорача онолку дизел колку што ќе побараат партнерите, од количините наменети за извоз. Тој тврди дека цените на нафтата паднале за пет до шест отсто по договорот со САД.
Изјавата ја даде во интервју со новинарот Павел Зарубин за рускиот државен медиум „Вести“, одговарајќи на прашањето колкави количества гориво Русија може да понуди на пазарот.
„Колку што сакаат нашите партнери, искрено кажано, од количините што ќе ги испорачуваме за извоз. Можеме да испорачаме сè“, изјави Новак.
Во петокот, Новак соопшти дека руските компании во октомври можат да испорачаат 500.000 тони дизел на американскиот и на светскиот пазар, а првите три танкери веќе тргнале кон источниот дел на Атлантикот.
Претходно тој нагласуваше дека ќе се извезуваат само количините што не се потребни за задоволување на домашната побарувачка.
Испораките биле договорени по телефонскиот разговор меѓу рускиот претседател Владимир Путин и американскиот претседател Доналд Трамп на 9 октомври. Потоа, американското Министерство за финансии издаде лиценца со која до 7 април 2027 година се дозволуваат трансакции поврзани со рускиот дизел.
Трамп тогаш објави дека Русија првично ќе испорача повеќе од 300.000 тони дизел, во ноември уште 500.000 тони, а потоа и еден милион тони.
Руската понуда доаѓа неколку месеци откако и самата Русија се соочи со недостиг на гориво.
Во јули, Москва го забрани извозот на дизел откако украинските напади со беспилотни летала врз рафинериите предизвикаа недостиг и раст на цените во одредени региони. Во тој период, возачите со часови чекаа во редици на бензинските пумпи, објави тогаш „Ројтерс“.
