Белгискиот претприемач Жо Балет ги купи правата на брендот и машините на германскиот производител на чоколадни пралини DreiMeister, кој во мај годинава отиде во стечај. Производството се сели во Белгија, додека повеќе од 100 работници во Германија останаа без работа.
Производството ќе биде преместено во Варегем, во близина на Гент, во Белгија. Работниците во Германија ги загубиле своите работни места уште во текот на летото, објави локалниот весник „Soester Anzeiger“.
Купувањето на брендот и опремата за весникот го потврдил советникот ангажиран од Балет за комуникација. Според него, новата компанија ќе преземе речиси сите машини и делови од осумте поранешни производствени линии, а демонтажата на опремата во Верл веќе започнала.
„Од крајот на октомври, кон Белгија ќе тргнат од 25 до 30 камиони“, изјавил советникот.
Балет планира да го започне производството во Белгија најдоцна до јануари.
Сè уште не е познато колку луѓе ќе бидат вработени во Белгија. Според „Soester Anzeiger“, нивниот број ќе биде значително помал од нешто повеќе од 100 работници, колку што биле вработени во фабриката во Верл пред нејзиното затворање.
Обидот производството да продолжи на старата локација, но со помал број работници, пропаднал и поради пречките поврзани со трудовото законодавство, наведува советникот.
Балет во Варегем ја основал компанијата Belgian Chocolate Studio, каде што планира заедно со својот син да произведува пралини и други чоколадни производи. Претходно работел за белгискиот производител на бисквити Jules Destrooper.
Историјата на DreiMeister датира од 50-тите години на минатиот век и кафулето Schröder во Верл. Компанијата била основана во 1973 година од Ханс Шредер, а името го добила по трите слаткарници што учествувале во нејзиното основање — во Верл, Липштат и Хам.
Од 2016 година, компанијата ја водел Маркус Лаки. На почетокот на јули станало јасно дека таа нема да може да биде спасена од пропаѓање.
Зградите во кои работела фабриката не се дел од стечајната маса, бидејќи се во сопственост на посебна компанија што му припаѓа на Лаки. DreiMeister ги користел објектите само под закуп.
Засега не е познато каква ќе биде иднината на фабричките објекти.
