Цените на енергенсите повторно вршат силен притисок врз животниот стандард во Германија. Горивата за моторни возила во септември се за 37,1 отсто поскапи во споредба со истиот месец лани, додека мазутот за греење бележи раст од речиси 75 проценти.
Инфлацијата во Германија во септември достигна 3,3 проценти на годишно ниво, покажуваат податоците на германскиот Завод за статистика (Destatis). Во август годишната стапка изнесуваше 2,9 проценти, а во јули 2,8 проценти.
На месечно ниво, потрошувачките цени во септември се повисоки за 0,6 проценти.
Главниот притисок доаѓа од енергетскиот сектор, каде што цените во септември се за 14,9 проценти повисоки во споредба со истиот период минатата година.
Горивата поскапи за повеќе од 37 проценти
Цените на бензинот и дизелот во септември се за 37,1 отсто повисоки во споредба со септември минатата година. Уште поголем раст бележи мазутот за греење, чија цена е повисока за 74,9 проценти.
Поскапувањето е забележливо и на месечно ниво. Во споредба со август, цените на горивата се повисоки за 6,9 проценти. Дизелот бележи раст од 7,5 проценти, а бензинот од 6,7 проценти.
Мазутот за греење во септември е за 18,5 проценти поскап во споредба со претходниот месец.
Растот на цените на нафтените деривати е поврзан со движењата на меѓународниот пазар на нафта, особено по почетокот на војната со Иран.
Струјата и гасот поевтинија
И покрај силниот раст кај горивата, дел од енергентите бележат пониски цени.
Електричната енергија во септември е за 5,5 проценти поевтина во споредба со истиот месец минатата година. Природниот гас е поевтин за 2,8 проценти, додека цената на централното греење е пониска за еден процент.
Овие движења покажуваат дека поскапувањето не ги опфаќа сите енергенси подеднакво, но растот кај бензинот, дизелот и мазутот создава дополнителен притисок врз трошоците на домаќинствата и бизнисите.
Храната со побавен раст на цените
Цените на храната во Германија во септември се за 0,4 проценти повисоки во споредба со истиот месец лани. Сепак, кај одредени производи разликите се значителни.
Јајцата се за 15,2 проценти поскапи, а свежиот зеленчук за 12 проценти. Од друга страна, путерот е за 29,5 проценти поевтин, млечните производи бележат пад од 5,5 проценти, а свежото овошје е поевтино за 4,9 проценти.
Цените на услугите во септември се за 2,7 проценти повисоки на годишно ниво. Основната инфлација, која не ги опфаќа храната и енергијата, изнесува 2,4 проценти.
Податоците покажуваат дека токму енергетските цени се еден од главните фактори за забрзувањето на инфлацијата во Германија, со директни последици врз трошоците за транспорт, греење и секојдневното живеење.
