Бразилскиот Конгрес усвои уставен амандман со кој се ограничува работната недела на најмногу 40 часа, што би можело да опфати околу 30 милиони работници и да му донесе политички поени на претседателот Луиз Инасио Лула да Силва, помалку од две недели пред вториот круг на претседателските избори, објавува „Гардијан“.
Лула силно се залагаше за измените, со кои дел од работниците ќе добијат дополнителен слободен ден неделно. На тој начин се обидува да ја намали предноста на својот противкандидат, десничарскиот сенатор Флавио Болсонаро, кој освои повеќе гласови во првиот круг.
Болсонаро со месеци се противеше на промената, но во вторникот го смени ставот, оценувајќи дека реформата ја поддржува „мнозинството бразилски работници“. Во средата им се приклучи на 75 сенатори кои гласаа за реформата. Против беше само Хамилтон Моурао, поранешниот потпретседател во мандатот на Жаир Болсонаро, таткото на Флавио.
Со амандманот се укинува шестдневната работна недела, режим според кој моментално работат околу 16 милиони луѓе. За повеќе од 30 милиони работници, максималното работно време постепено ќе се намали од 44 на 40 часа неделно.
Промената најмногу ќе ги погоди секторите со пониски плати, како трговијата, рестораните и хотелите. Станува збор за група работници кај кои Лула изгуби најголем дел од поддршката по изборите во 2022 година.
„Укинувањето на режимот 6 дена работа – 1 ден одмор значи многу повеќе од промена на работното време. Тоа значи повеќе време за живот, одмор, семејство, за да гледате како растат вашите деца, да се грижите за себе и да уживате во животот“, напиша Лула на социјалните мрежи.
Од TikTok до бразилскиот Сенат
Иницијативата започнала како движење на TikTok под името „Живот надвор од работата“, основано од работник во аптека. По успехот на кампањата, нејзиниот иницијатор влегол во политиката, а Лула подоцна ја прифатил идејата.
Многумина верувале дека Сенатот нема да гласа за предлогот, особено откако десницата обезбедила значително мнозинство во Конгресот за периодот што започнува во 2027 година. Сепак, претседателот на Сенатот, Дави Алколумбре, го ставил предлогот на дневен ред.
Партијата на Болсонаро размислувала да го блокира, но анкетите покажале дека повеќе од 70 проценти од населението ја поддржува промената.
Во мај Болсонаро предупредуваше дека реформата може да предизвика „масовна невработеност“, став што го делат и дел од здруженијата на работодавачи. И по промената на ставот, тој рече дека поддржува „нешто уште подобро“, алудирајќи на сопствениот предлог платата да зависи од реално одработените часови.
Според бразилскиот весник „Фолја“, Болсонаро им рекол на деловните лидери дека, доколку победи на изборите, би разгледал измени на одредени делови од амандманот.
Измените ќе стапат во сила по изборите
Реформата нема да стапи во сила пред вториот круг од претседателските избори, закажан за 25 октомври. По официјалното прогласување на амандманот од страна на претседателот на Сенатот, ќе следува период од 60 дена, по што шестдневната работна недела ќе биде укината.
Максималното работно време првично ќе се намали на 42 часа неделно, а по дополнителни 14 месеци ќе се сведе на 40 часа.
Истражувачот Виктор Ескобар од Лабораторијата за партии, избори и компаративна политика смета дека одлуката веќе сега може да му помогне на Лула, бидејќи ќе влијае врз економското расположение на гласачите пред изборите.
Лилијан Кристо дос Сантос (50), продавачка од Салвадор, вели дека моментално има само еден слободен ден неделно.
„Немам време да одам на лекар, на плажа или да се грижам за себе. На единствениот слободен ден морам да ја чистам куќата и да се грижам за семејството“, раскажала таа.
Според Ескобар, Лула добил дополнителен замав и благодарение на собирите на поддржувачите низ земјата и засиленото присуство на социјалните мрежи.
„Трката и понатаму изгледа прилично изедначена, со одредена предност за Болсонаро, но изборите сè уште се целосно отворени“, оценува тој.
