Словачкиот премиер Роберт Фицо остро ја критикуваше Европската Унија по договорот меѓу американскиот претседател Доналд Трамп и рускиот претседател Владимир Путин за испорака на руски дизел во САД.
Фицо ги нарече Трамп и Путин „фраери“ поради договорот, оценувајќи дека САД на тој начин добиваат поевтин дизел, додека Русија остварува големи приходи во државниот буџет.
„Не им е гајле за целиот свет, ги гледаат своите национални интереси. А ние во ЕУ забрануваме, воведуваме санкции и ембарга, морализираме, плаќаме дизел како луди и се тресеме од страв дали ќе го има доволно“, изјави Фицо, пренесува „Деник Н“.
Тој упати и предупредување до европските политичари.
„Ги предупредувам американофобичните и русофобичните политичари дека наскоро на бензинските пумпи во ЕУ можеби ќе точат скап американски дизел со руско потекло. Тоа може да се случи само во ЕУ, која е опседната со омраза и не ја разбира реалноста во светот“, порача словачкиот премиер.
Како што пренесува „еРепорт“, Фицо претходно предупреди дека последица од европската политика може да биде цена на дизелот од три евра за литар, па дури и недостиг на гориво.
Договорот меѓу Вашингтон и Москва го искористи и како аргумент во одбрана на својата надворешна политика „на сите четири страни на светот“. Според него, Словачка не треба да биде „послушен слуга“, туку да ги следи сопствените национални интереси.
Трамп во петокот на социјалните мрежи објави дека постигнал договор со Путин за испорака на дизел. Според агенцијата „Асошиејтед прес“, Русија треба веднаш да испорача повеќе од 300.000 тони дизел, потоа дополнителни 500.000 тони во ноември и еден милион тони веднаш потоа, а во краток рок се предвидени и уште три милиони тони.
„Асошиејтед прес“ потсетува дека Трамп минатиот месец потпиша обемен закон за санкции против Русија, насочен кон нејзиниот енергетски сектор.
Во истото видео Фицо го бранеше и предлог-буџетот на Словачка за 2027 година, за кој парламентот треба да расправа во среда.
Истиот ден, под словачко претседавање, ќе се одржи и состанокот на премиерите на земјите од Вишеградската група. Според Фицо, главни теми ќе бидат цените на енергијата и горивата, како и новиот буџет на ЕУ за периодот од 2028 до 2034 година.
