Аеродромот во Истанбул го презеде првото место на листата на најповрзани аеродроми во светот според меѓународниот воздушен сообраќај, оставајќи го лондонскиот Хитроу на втората позиција.
Ова го покажува најновиот извештај „Мегахабс 2026“, објавен од американската компанија „ОАГ“, која анализира податоци од авиоиндустријата.
Според индексот, објавен во септември, по Истанбул и Хитроу следуваат аеродромите Амстердам Схипхол, Куала Лумпур и Чикаго О’Хер.
Рангирањето се заснова на анализа на можностите за преседнување меѓу меѓународните летови во однос на вкупниот број дестинации до кои може да се стигне. Пресметките за оваа година се направени врз основа на распоредот на летовите на 2 август, кој бил најфреквентниот ден во глобалниот воздушен сообраќај во набљудуваниот период.
„Денес летаме до речиси 350 дестинации низ светот, со значителен простор за понатамошен раст“, изјави за Си-Ен-Ен генералниот директор на аеродромот во Истанбул, Селахатин Билген.
Тој истакна дека високата ефикасност и поволните оперативни трошоци продолжуваат да привлекуваат нови авиокомпании секоја година.
Аеродромот во Истанбул моментално опслужува повеќе од 84 милиони патници годишно. Долгорочните планови за проширување предвидуваат зголемување на неговиот капацитет на дури 200 милиони патници годишно, пренесува турскиот весник „Хуриет“.
Со ваквите планови, Истанбул има амбиција дополнително да ја зацврсти својата позиција како едно од најважните меѓународни авијациски јазли во светот.
