Кирил Дмитриев, пратеник на рускиот претседател за инвестиции и економска соработка со странство, денеска изјави дека е дојдено време американската компанија „Боринг“, основана од претприемачот Илон Маск, да започне со изградба на тунел меѓу Русија и САД.
„Дојде време компанијата „Боринг“ да започне со изградба на тунелот Путин-Трамп, кој ќе ги обедини Русија и Соединетите Американски Држави, Евроазија и Америка“, напиша Дмитриев на социјалната мрежа Икс.
Во објавата Дмитриев сподели и прелиминарен дијаграм за тоа како би можел да изгледа тунелот под Беринговиот Теснец, објави руската новинска агенција РИА Новости.
Уште во октомври 2025 година, шефот на Рускиот фонд за директни инвестиции најави можност за изградба на интерконтинентален тунел што би ја поврзал Алјаска со Русија, со користење на технологијата на компанијата „Боринг“.
Тогаш тој процени дека проектот би чинел до осум милијарди долари и би можел да биде завршен за помалку од осум години.
