Руската влада во саботата делумно ја укина забраната за извоз на дизел-гориво, овозможувајќи во почетната фаза 500.000 тони од овој енергент да се пласираат на светскиот пазар.
Одлуката стапува во сила во рамките на договорот меѓу рускиот претседател Владимир Путин и американскиот претседател Доналд Трамп, соопшти руската влада.
Според одлуката, руските нафтени компании веднаш ќе започнат да договараат испораки на дизел со странски партнери, со согласност на владата, пренесе руската новинска агенција ТАСС.
Трамп во петокот изјави дека во разговорот со Путин бил договорен извоз на повеќе милиони тони дизел од Русија на американскиот и светскиот пазар. Тој оцени дека тоа ќе доведе до брз и значителен пад на цените на горивото.
На својата социјална мрежа „Трут соушл“, Трамп наведе дека Русија веднаш ќе испорача повеќе од 300.000 тони дизел, дополнителни 500.000 тони во текот на ноември, а потоа и уште еден милион тони во наредниот период.
По разговорот со Трамп, рускиот претседател изјави дека Москва ја потврдила подготвеноста да испорачува нафта и нафтени деривати на американскиот и светскиот пазар.
