Бугарија за само неколку години стана една од водечките европски земји во складирањето електрична енергија во големи батериски системи. Според „Солар Пауер Јуроп“, во 2025 година била меѓу петте земји со најголем батериски капацитет, зад Германија, Велика Британија, Италија и Украина.
Во земјата моментално има околу 14,7 гигават-часови батериски капацитет, а до крајот на годинава се очекува да достигне 20 гигават-часови. Голем дел од инвестициите се насочени кон складирање на вишокот електрична енергија произведена од соларните централи во текот на денот, која потоа се продава во вечерните часови кога цените се повисоки.
Развојот на секторот беше поттикнат и со 700 милиони евра европска поддршка преку бугарската програма „Рестор“. Според проценките, овие средства привлекле повеќе од две милијарди евра приватни инвестиции, додека вкупната вредност на инвестициите со инфраструктурата достигнала околу седум милијарди евра.
Моделот се покажал како профитабилен. Според „Капитал“, електричната енергија за полнење на батериите просечно чини околу 39 евра за мегават-час, а подоцна може да се продава за околу 161 евро. Експертот Мартин Владимиров наведува дека батериски систем од 150 мегавати може да носи до 70.000 евра приходи дневно, а инвестицијата може да се исплати за околу три години.
Сепак, експертите предупредуваат дека најголем дел од финансиската корист оди кај релативно мал број инвеститори. Во исто време, батериските системи имаат важна улога во стабилизирањето на електроенергетскиот систем и интегрирањето на обновливите извори на енергија.
