Директорката на Меѓународниот монетарен фонд (ММФ), Кристалина Георгиева, во средата во Сингапур порача дека и богатите и сиромашните земји мораат побрзо да преземат мерки за намалување на долгот и нееднаквоста.
Георгиева го одржа говорот во пресрет на есенските состаноци на ММФ и Светската банка, кои следната недела ќе се одржат во Бангкок. На состаноците министрите за финансии и гувернерите на централните банки од 191 земја членка ќе ја оценуваат состојбата на светската економија и ќе разговараат за стратегии за финансиска стабилност и одржлив раст.
Шефицата на ММФ предупреди дека економиите истовремено се соочуваат со последиците од забрзаниот развој на вештачката интелигенција, високата задолженост и шоковите предизвикани од војните на Блискиот Исток и во Украина.
„Пред нас се некои многу тешки политички одлуки“, изјави Георгиева.
Таа додаде дека неопходните мерки повеќе не можат да се одложуваат.
„Не можеме повеќе да го одложуваме неопходното дејствување – ги имате алатките, сега имајте мудрост да ги употребите“, порача Георгиева.
Според неа, прекумерниот долг станува сè поголем товар и за богатите земји, како САД, Јапонија и Германија, но и за земјите со ниски приходи, кои се принудени да избираат меѓу јавната потрошувачка и отплатата на скапите кредити во услови на високи каматни стапки.
Георгиева укажа и на ризиците поврзани со брзото ширење на капацитетите на центрите за податоци потребни за развојот на вештачката интелигенција. Големите инвестиции во овој сектор придонесоа за раст на цените на акциите и корпоративните профити.
„Сакале или не, се плашеле или не, вештачката интелигенција е тука и брзо станува клучен фактор за позицијата на земјите во светската економија“, изјави таа.
Шефицата на ММФ предупреди дека постои временско задоцнување меѓу големите инвестиции во вештачката интелигенција и остварувањето на очекуваните придобивки. Доколку приходите бидат послаби од очекуваното, разочарувањето би можело да прерасне во поширок глобален економски шок.
Георгиева ги повика државите да ја ограничат јавната потрошувачка, по потреба да ја зголемат цената на задолжувањето со цел да ја контролираат инфлацијата, да ги заштитат најранливите граѓани и да усвојат политики за регулирање на вештачката интелигенција.
Таа исто така повика на поголеми инвестиции во обука на работниците, пофлексибилни пазари на трудот, поттикнување на претприемништвото и зајакнување на енергетската безбедност.
