И покрај предизвиците во глобални рамки, Македонија подготвена ќе ја дочека претстојната зимска сезона. Сигурноста на снабдувањето со гас и електрична енергија останува наш приоритет – изјави денеска министерката за енергетика Сања Божиновска по завршувањето на вториот министерски самит за енергетика, што се одржа во Белград.
Како што информира Божиновска, покрај интензивните активности за интерконекторите со Грција и Србија, веќе се планира од Бугарија преку Македонија до Италија да се постават 2.000 мегавати нови конекции. За тоа, истакна, подетални технички состаноци ќе се одржат во ноември.
– Денеска, во Белград имавме втор регионален состанок на четирите држави: ние, Република Србија, Република Грција и Република Бугарија. Дискутиравме што е постигнато бидејќи првиот состанок беше во мај, а веќе во септември девет систем-оператори од девет држави, и ние и Република Србија, го потпишавме пристапувањето кон Вертикалниот коридор. Тоа значи дека се грижиме за снабдувањето на нашите граѓани, односно досега имавме само една конекција со Република Бугарија, а сега ќе имаме и алтернатива од Грција преку Македонија – ќе биде транспортиран гасот до Централна и Јужна Европа. Исто така, разговаравме за предизвиците што претстојат во следниот период, за зимата. Ние сме подготвени, имаме добра хидрологија. Беше спомнат и коридорот Исток – Запад, од истокот кон западот, што значи од Република Бугарија преку нас сè до Италија се планира поставување 2.000 мегавати нови конекции. За тоа ќе имаме подетално технички состаноци во ноември – напомена министерката.
На заедничката прес-конференција со своите колеги од Србија, Бугарија и Грција, по завршувањето на пленарниот состанок во рамките на самитот, Божиновска уште еднаш ја испрати пораката дека за поголема сигурност неопходна е подобра поврзаност.
– Исклучително сме посветени на зајакнувањето на сигурноста, но и на соработката. Многу е добро што ги вклучуваме и операторите на преносните системи, кои понекогаш имаат предизвикувачка работа. Се разбира, разговаравме и за зимата, за тоа како сме подготвени, како и за комуникацијата во однос на преносните системи за гас. Сметам дека е многу важно да имаме вакви состаноци во овој формат, каде што можеме да ги разгледаме најновите информации и тековните предизвици – рече Божиновска.
Таа оцени дека е огромен успех што на самитот се присутни две земји од ЕУ и две земји што сакаат да бидат во ЕУ.
– Го обединивме нашето знаење, но и волјата за соработка. Мислам дека се движиме многу бргу бидејќи од мај, кога првпат се сретнавме, па до септември, веќе постигнавме нешто опипливо. Сметам дека треба да бидеме позитивен пример и за ЕУ и за Енергетската заедница со нашите брзи и конкретни резултати – потенцира Божиновска.
Според неа, до средината на следната година се очекува да заврши интерконекцијата со Грција, а веќе е потпишан и договорот за Србија.
– До 2028 година ќе бидеме подготвени да бидеме алтернатива во снабдувањето на Јужна и Централна Европа со гас, а цевките се исто така подготвени и за водород, така што подготвени сме и за новите технологии. Веќе се справивме и со прашањата поврзани со механизмот за јаглеродно приспособување на границите. Продуктоводот, кој е многу успешен, годинава почна со работа од Грција до Скопје и подготвени сме да бидеме дел од студијата за изводливост, која ќе продолжи да обезбедува сигурност во снабдувањето и за Србија – посочи министерката.
Божиновска на самитот ќе оствари билатерална средба со министерката Петрова, на која се очекува да стане збор за натамошното унапредување и проширување на веќе воспоставената соработка.
Денешниот самит во Белград е продолжение на првиот министерски самит што се одржа во Атина на 15 мај годинава, кога четирите земји се согласија дека енергетската сигурност, стабилноста и отпорноста на системите не можат повеќе да се гледаат само како национални, туку како заеднички регионални приоритети.
