Ситуацијата со снабдувањето со електрична енергија во Европската Унија би можела да биде отежната во наредните недели поради последиците од неодамнешните топлотни бранови, изјави европскиот комесар за енергетика Дан Јоргенсен.
„Упорните високи температури и рекордно ниските водостоји негативно влијаат врз производството и потрошувачката на електрична енергија во централна и југоисточна Европа“, напиша Јоргенсен на социјалната мрежа X.
Тој наведе дека безбедноста на снабдувањето со електрична енергија е стабилна и дека во моментов нема краткорочни ризици за доволно снабдување, но предупреди дека се очекува ситуацијата да остане напната во наредните недели.
Високите температури ја зголемуваат потрошувачката на електрична енергија поради интензивното користење клима-уреди, додека ниските водостоји на реките истовремено го отежнуваат работењето на одредени термоелектрани и хидроелектрани и ги намалуваат расположливите капацитети за производство на електрична енергија.
Посебен притисок се очекува во земјите од централна и југоисточна Европа, каде што во последните недели се забележани исклучително високи температури и неповолни хидролошки услови.
Јоргенсен истакна дека, и покрај актуелните предизвици, во моментов нема непосредни ризици за безбедноста на снабдувањето со електрична енергија во ЕУ.
