Американскиот претседател Доналд Трамп најави воведување, како што наведе, „најразорна економска операција што некогаш била преземена против која било земја“.
Трамп ги предупреди државите кои ќе му обезбедуваат финансиска или друга помош на Иран дека и самите ќе се соочат со „огромни економски последици“.
„Никој не ѝ даде на Исламската Република Иран поголема можност да постигне договор од мене. За жал по нив, не успеаја да ја искористат. Затоа, денес ја објавувам најразорната економска операција што некогаш била преземена против која било земја. Ова ќе биде економска војна и изолација од невидени размери“, напиша Трамп на социјалната мрежа Truth Social.
Тој наведе дека мерките ќе опфатат шверц на нафта, размена и трансфери на готовина, менувачници, регистри на бродови и фиктивни компании, порачајќи дека „сето тоа мора да престане веднаш“.
Трамп ги повика американските сојузници да им се придружат на САД во изолацијата на Иран.
„Ова ќе биде економски Ден Д и ни се потребни сите наши сојузници да застанат со Соединетите Американски Држави за да ја изолираме и победиме иранската закана. Овие манијаци се на колена, а овие историски мерки ќе ги осакатат, како и нивната способност да шират терор низ светот“, предупреди американскиот претседател.
Трамп повтори и дека Иран „никогаш нема да има нуклеарно оружје“.
