Националниот долг на Соединетите Американски Држави во средата надмина рекордни 40 илјади милијарди долари, само пет месеци откако во март достигна 39 илјади милијарди долари.
Новиот рекорд доаѓа откако американскиот долг само пет месеци претходно изнесуваше 38 илјади милијарди долари, што покажува забрзано задолжување на федералната влада.
Голем дел од федералните расходи одат за одбрана, социјални програми како Social Security и Medicare, како и за камати на растечкиот дефицит.
Износот од 40 илјади милијарди долари ги истакнува спротивставените приоритети на администрацијата – од зголемување на издвојувањата за одбрана до обидите за намалување на цените на горивата и прехранбените производи.
Портпаролот на Белата куќа, Куш Десаи, изјави дека администрацијата на Трамп е „фокусирана на намалување на расипничкото трошење, измамите и злоупотребите во федералните расходи, истовремено забрзувајќи го економскиот раст за односот меѓу долгот и БДП на САД да се движи во добра насока“.
Експертите, сепак, предупредуваат дека растот на долгот веќе ги погодува граѓаните преку поскапото задолжување за станбени кредити и автомобили, пониските плати поради недостиг на средства за инвестиции во компаниите, како и повисоките цени на стоките и услугите.
Мајкл А. Петерсон, извршен директор на фондацијата „Питер Г. Петерсон“, предупреди дека законодавците треба да преземат мерки за да се обезбеди поодржлив економски пат за земјата и идните генерации.
Американскиот долг расте низ повеќе претседателски мандати бидејќи државата троши повеќе отколку што собира преку даноци.
Дополнителното задолжување значително се зголеми за време на пандемијата на Ковид-19, кога федералната влада масовно позајмуваше средства за стабилизација на економијата. Ново зголемување на јавната потрошувачка следуваше и по минатогодишниот закон за намалување на даноците и јавната потрошувачка.
САД имаат законски лимит на задолжувањето, кој го одредува Конгресот. Според проценките на Bipartisan Policy Center, земјата би можела да го достигне лимитот од 41,1 илјади милијарди долари меѓу крајот на зимата и средината на летото 2027 година. Тоа повторно би барало гласање во Конгресот за зголемување или суспендирање на лимитот.
Според понова анализа на Организацијата за економска соработка и развој (ОЕЦД), фискалната позиција на САД во моментов е најлоша меѓу развиените земји.
