Номиналниот бруто-домашен производ (БДП) на Полска достигна 922,9 милијарди евра, што претставува 4,9 отсто од вкупниот економски учинок на 27-те земји членки на Европската Унија, покажуваат најновите податоци на Европската статистичка служба – Евростат.
Со тоа Полска се позиционира веднаш зад Холандија, а пред Белгија, Шведска, Ирска и Австрија. Полската економија сега е повеќе од двојно поголема од економијата на Романија, нејзиниот најблизок регионален конкурент, чиј БДП изнесува 380,1 милијарда евра.
Следуваат Чешка со БДП од 347,3 милијарди евра и Унгарија со 218,8 милијарди евра, со што Полска дополнително ја потврдува својата позиција на регионален економски лидер.
Германија останува најголемата економија во ЕУ со БДП од 4,47 билиони евра, што претставува 23,8 отсто од вкупниот економски учинок на Унијата. Франција е втора со 2,99 билиони евра, по што следуваат Италија со 2,26 билиони, Шпанија со 1,69 билиони и Холандија со 1,17 билиони евра.
Вкупниот БДП на Европската Унија во 2025 година достигна 18,8 билиони евра.
Долгорочните прогнози укажуваат дека силниот раст на полската економија би можел да продолжи и во следните години.
Според извештајот на Меѓународниот монетарен фонд (ММФ), објавен претходно оваа година, се очекува Полска до 2028 година да ја престигне Швајцарија и да стане 20-та најголема економија во светот, објави полскиот јавен сервис ТВП.
