Европските потрошувачи би можеле да добијат природен гас од подморското наоѓалиште во близина на Кипар веќе во март 2028 година, изјави кипарскиот министер за енергетика Мајкл Дамијанос.
Дамијанос изјави дека источниот Медитеран забрзано станува алтернативен извор на енергија за европските земји, откако војната меѓу Русија и Украина и конфликтите на Блискиот Исток го принудија континентот да бара нови извори за снабдување.
Тој додаде дека партнерите во експлоатацијата на гасот, француската компанија „TotalEnergies“ и италијанската „Eni“, минатиот месец донеле конечна одлука да продолжат со развојот на наоѓалиштето на природен гас Кронос, во близина на јужниот брег на Кипар.
Кога проектот ќе биде реализиран, гасот од ова наоѓалиште во источниот Медитеран за првпат ќе биде пласиран на европските пазари, пренесува АП.
Според планот на француско-италијанскиот конзорциум, работите на гасоводот што ќе го поврзува Кронос со постојната инфраструктура на египетското наоѓалиште на природен гас Зохр, оддалечено 105 километри, ќе започнат подоцна оваа година и ќе траат до 18 месеци.
Испораката на гасот од Кронос во Египет, каде што ќе се врши неговата преработка, се смета за економски најисплатлива опција, а проектот ќе чини околу две милијарди долари.
Според договорот, една петтина од гасот што ќе се експлоатира од наоѓалиштето Кронос може да биде искористена за задоволување на домашните енергетски потреби на Египет.
