Сѐ поголем број трговци на мало во Германија стравуваат за опстанокот на своите компании, покажуваат најновите податоци на Институтот Ifo. Според истражувањето, индексот што го мери стравот од затворање фирми достигнал рекордно високо ниво во април годинава.
Економистите посочуваат дека слабата потрошувачка, високите оперативни трошоци и намалената куповна моќ на граѓаните создаваат сериозен притисок врз малопродажниот сектор. Особено погодени се продавниците за мебел, облека и електроника.
Од Институтот Ifo наведуваат дека деловната клима во германската трговија на мало останува исклучително неповолна, а многу компании се соочуваат со пад на приходите и неизвесност околу идните инвестиции.
Дополнителен проблем претставуваат високите цени на енергенсите и растечките трошоци за работна сила, поради што дел од компаниите веќе размислуваат за затворање на деловните објекти или намалување на бројот на вработени.
Германија, како најголема европска економија, веќе подолг период се соочува со слаб економски раст, а трговците предупредуваат дека без подобрување на условите и зголемување на потрошувачката, кризата во секторот би можела дополнително да се продлабочи.
