Шведска значително ја зголеми финансиската помош за мигрантите кои доброволно сакаат да ја напуштат земјата и да се вратат во својата татковина. За возрасно лице е предвидена помош до 350.000 шведски круни, што е околу 32.000 евра, додека едно домаќинство може да добие најмногу 600.000 круни, односно околу 55.000 евра.
Новите правила стапија во сила на 1 јануари 2026 година, а интересот за програмата брзо се зголеми. До средината на февруари, шведската Агенција за миграција регистрирала 272 барања, од кои 82 веќе биле одбиени. Неколку недели подоцна бројот на пријавени пораснал на околу 370, а властите ги одобриле и првите барања за зголемената финансиска помош.
Програмата не се однесува на сите странци кои живеат во Шведска. За финансиска помош можат да аплицираат, меѓу другите, лица со важечка шведска дозвола за престој добиена врз основа на заштита, како бегалци или лица со одобрена супсидијарна заштита. Вообичаено, дозволата за престој треба да биде издадена на 12 септември 2024 година или порано.
Парите може да се искористат за преселување во матичната земја или во друга земја во која лицето има право на престој. Програмата не опфаќа преселување во друга земја членка на ЕУ, Европскиот економски простор или во Швајцарија.
Според новите правила, возрасно лице може да добие до 350.000 круни, брачен или вонбрачен пар до 500.000 круни, а едно домаќинство најмногу 600.000 круни. За секое дете се предвидени дополнителни 25.000 круни, односно околу 2.300 евра.
Финансиската помош претходно била значително помала. Возрасно лице можело да добие само 10.000 круни, што значи дека максималниот износ сега е зголемен дури 35 пати.
Шведската влада сака со оваа мерка да го поттикне доброволното враќање на лицата кои не успеале да се интегрираат во шведското општество. Властите сметаат дека враќањето може да им овозможи нов почеток на овие лица, но и да придонесе за економскиот развој и пазарот на труд во нивните матични земји.
Програмата за доброволно враќање во Шведска постои од 1984 година, но досега имала мал број корисници. Владата затоа го зголеми износот на помошта со цел финансискиот поттик да стане доволно значаен за мигрантите кои сакаат да се вратат.
Мерката предизвика и политички реакции. Критичарите предупредуваат на можните последици од ваквата политика, како и на фактот дека значителното зголемување на финансиската помош дојде и покрај резервите изразени во претходната државна истрага.
