Холандскиот пиварски гигант „Хајнекен“ го назначи Бразилецот Рафаел Оливеира за нов главен извршен директор, со што за првпат во својата историја на чело на компанијата поставува човек кој не доаѓа од сопствените редови.
Оливеира ќе ја преземе функцијата од 1 октомври, наследувајќи го Долф ван ден Бринк, кој ја напушти позицијата по речиси шест години на чело на компанијата.
Она што го прави изборот невообичаен е фактот што новиот директор нема искуство во пивската индустрија. Во моментов тој е извршен директор на компанијата JDE Peet’s, еден од најголемите светски производители на кафе и чај.
Пред тоа, Оливеира поминал десет години во прехранбениот гигант Kraft Heinz, каде извршувал повеќе високи раководни функции на меѓународно ниво. Неговата кариера започнала во финансискиот сектор, каде работел и за инвестициската банка Goldman Sachs.
Од „Хајнекен“ соопштија дека по обемна глобална потрага се одлучиле токму за Оливеира поради неговото искуство во водење големи меѓународни компании, спроведување стратешки трансформации и остварување финансиски резултати.
Назначувањето доаѓа во период кога производителите на алкохолни пијалаци се соочуваат со забавување на продажбата, промени во навиките на потрошувачите и зголемен интерес за безалкохолни производи.
Инвеститорите позитивно ја примија веста, оценувајќи дека надворешен кандидат може да донесе нова енергија и свеж пристап во работењето на компанијата. Сепак, дел од аналитичарите предупредуваат дека недостигот од директно искуство во пиварството ќе претставува сериозен предизвик за новиот директор.
Со овој потег „Хајнекен“ ја прекинува долгогодишната традиција на промовирање кадри од сопствените редови и испраќа јасен сигнал дека е подготвен за промени во обид да го забрза растот и да ја подобри својата позиција на глобалниот пазар.
