Турската Агенција за регулација и надзор на банките (BRSA) ја одзеде дозволата за работа на истанбулската филијала на иранската Bank Mellat, со што по повеќе од четири децении се прекинува нејзиното кредитно работење во Турција, во период кога САД ги засилуваат санкциите насочени кон финансиските мрежи на Иран.
Регулаторот соопшти дека продолжувањето на работењето на банката би можело да претставува ризик за депонентите и финансиската стабилност, поради што постапката е започната врз основа на соодветна одредба од турскиот Закон за банки.
Bank Mellat е една од најголемите финансиски институции во Иран. Според податоците на иранскиот финансиски сервис Shakhesban, во март 2026 година банката имала вкупна актива од околу 47,9 квадрилиони ирански ријали, односно околу 34,8 милијарди долари.
Bank Mellat е под американски, европски и британски санкции и финансиски ограничувања поради наводни врски со иранските нуклеарна и ракетна програма. Министерството за финансии на САД првпат воведе санкции кон банката во октомври 2007 година, обвинувајќи ја дека обезбедувала финансиски услуги за Иранската организација за атомска енергија.
Банката е присутна во Турција од почетокот на 1980-тите, кога отворила филијала во Истанбул, а подоцна се проширила и во Измир и Анкара. Од Bank Mellat наведуваат дека работењето во Турција е една од нивните значајни активности во странство и дека банката поддржува економски активности и трговија меѓу Турција и Иран.
На крајот на 2025 година, турското работење на Bank Mellat имало вкупна актива од 41 милион евра, односно околу 42,1 милион долари, и вработувало 39 лица, според податоците на Здружението на банки на Турција.
Одлуката на турскиот регулатор следува по неодамнешното заострување на американските санкции кон ирански субјекти, во рамките на операцијата „Economic Outcast“, започната кон крајот на август со цел да се прекинат преостанатите финансиски канали на Иран и мрежите кои, според Вашингтон, му помагаат на Техеран да ги заобиколи санкциите.
Американскиот министер за финансии Скот Бесент предупреди дека странски компании и финансиски институции кои соработуваат со санкционирани ирански субјекти или ги поддржуваат нивните мрежи за заобиколување на санкциите, исто така може да бидат предмет на секундарни санкции.
Во средата, турската BRSA му ја предаде на Турскиот фонд за осигурување на штедни влогови (TMSF) контролата врз уделите што ги поседуваат тројца најголеми акционери на Golden Global Investment Bank, што опфаќа речиси целосна контрола врз банката. Одлуката уследи помалку од две недели откако САД воведоа санкции кон банката и две нејзини филијали поради наводни врски со Иран.
Вашингтон на 8 септември дополнително ги прошири санкциите кон иранскиот воздухопловен сектор, опфаќајќи 36 субјекти, меѓу кои 27 ирански авиокомпании и неколку компании во Турција, кои беа обвинети за поддршка на Mahan Air и други ирански авиопревозници.
Mahan Air потоа ги прекина летовите кон Истанбул и Анкара, почнувајќи од 21 септември.
