Белата куќа разгледува можност за склучување деловни договори со Русија пред завршувањето на војната во Украина, во рамки на напорите на администрацијата на американскиот претседател Доналд Трамп да го поттикне рускиот претседател Владимир Путин да ги прекине борбите.
Тоа го изјавиле две лица запознаени со преговорите, пишува „Њујорк тајмс“.
Американски функционер, кој сакал да остане анонимен, изјавил дека деловните договори пред завршувањето на војната би можеле да покажат дека САД се сериозни во намерата да ги „ресетираат“ односите со Русија.
Таквиот пристап претставува промена во однос на претходната порака на Трамп дека деловни договори со Москва нема да има „сè додека не се реши прашањето за војната“, посочува њујоршкиот весник.
Во меѓувреме, Конгресот усвои нов закон за санкции насочени кон рускиот енергетски сектор, со кој на претседателот би му било овозможено да воведе царини до 100 отсто за земјите што купуваат големи количества руска нафта или гас, како и санкции против руски функционери, бизнисмени и финансиски институции.
Законот во Претставничкиот дом е усвоен со 262 гласа „за“ и 159 „против“, а Доналд Трамп навести дека ќе го потпише.
Американски функционер, кој исто така сакал да остане анонимен, изјавил дека администрацијата истовремено разгледува притисок и поттикнувања, при што моментално фокусот повеќе е ставен на економските придобивки за Русија.
Целта, како што рекол тој, е да се создадат поттикнувања за руската елита да го поддржи мирот и да се убедат влијателни руски функционери дека Трамп сака да изгради нови односи со Москва.
Сè уште не е јасно за какви конкретни деловни договори би станувало збор.
Советникот на Кремљ за надворешна политика, Јуриј Ушаков, по состанокот на Путин со пратениците на Трамп, Стив Виткоф и Џаред Кушнер, на 5 септември изјави дека се разговарало за економски прашања и потенцијални големи руско-американски проекти од заеднички интерес.
Руските функционери претходно предложија соработка со САД во областа на ретките метали и алуминиумот, заеднички инвестиции на Арктикот, како и вклучување американски компании во продажбата на руски природен гас во Европа.
Промената на пристапот уследи по застојот во преговорите за можното повлекување на Украина од делови од Донбас, што Москва го бара.
Според украински функционери, преговорите меѓу САД, Украина и Русија би можеле да продолжат во октомври.
Се очекува на разговорите да се разгледува и можен ограничен прекин на огнот, вклучително и прекин на нападите врз бродови во Црното Море или врз енергетската инфраструктура.
