Просечната цена на дизелот во САД за првпат во историјата надмина 6 долари по галон, покажуваат податоците на GasBuddy, додека нарушувањата во снабдувањето со нафта и горива дополнително ги зголемуваат инфлаторните притисоци врз американската економија.
Рекордот доаѓа во услови на продолжување на војната меѓу САД и Иран, како и украинските напади врз руските рафинерии, што дополнително ја намалуваат понудата на нафтени деривати на глобалниот пазар.
Дизелот е од клучно значење за американската економија бидејќи го користат камиони, возови, бродови, земјоделската механизација и тешката опрема во градежништвото. Поради тоа, поскапувањето на дизелот не се одразува само врз возачите, туку постепено ги зголемува и трошоците за транспорт и дистрибуција на стоката.
Цената на суровата нафта е еден од главните фактори зад поскапувањето. Во четвртокот цената на северноморскиот Brent се искачи на 107,63 долари за барел, додека американскиот WTI достигна 102,48 долари, што се највисоки нивоа од средината на мај.
Според податоците на GasBuddy, дизелот сега е поскап за околу 2,30 долари по галон во однос на пред една година. Истовремено, залихите на дизел во САД се околу 13 отсто под петгодишниот просек, според американската Управа за енергетски информации (EIA).
Експертите предупредуваат дека ефектот од рекордната цена на дизелот може да се почувствува низ целиот синџир на снабдување. Поскапувањето на транспортот ги зголемува трошоците за превоз на храна, индустриски производи и други стоки, што може дополнително да ги зголеми крајните цени за потрошувачите.
„Секој камион, секоја испорака, секој пакет и секое купување намирници сега станаа поскапи“, предупреди аналитичарот на GasBuddy, Патрик Де Хан, оценувајќи дека рекордните цени на дизелот би можеле повторно да ја разгорат инфлацијата низ целиот синџир на снабдување.
Поскапувањето на горивата создава и политички притисок врз администрацијата на Доналд Трамп, особено пред ноемвриските избори за Конгресот. Белата куќа соопшти дека претседателот останува фокусиран на зголемување на американскиот капацитет за рафинирање и на намалување на енергетските трошоци.
Во меѓувреме, цените на нафтата и денес остануваат над границата од 100 долари за барел. Brent во петокот падна, но неделава сепак бележи раст од речиси 13 отсто, поради стравувањата дека нарушувањата во снабдувањето ќе продолжат.
Доколку високите цени на дизелот и нафтата се задржат, економистите очекуваат дополнителен притисок врз транспортот, производството и цените на стоките, што би можело да го отежне намалувањето на инфлацијата во САД.
