Кина смета дека меѓународниот подем на јуанот е неповратен и подготвува стратегија за дополнително зајакнување на неговата улога во глобалниот финансиски систем, објави South China Morning Post.
Кинеските финансиски власти најавија нови чекори за зголемување на употребата на јуанот во меѓународната трговија, инвестициите и финансирањето, како и за развој на офшор пазарите на кинеската валута.
„Интернационализацијата на јуанот е континуиран и стабилен процес и неповратен тренд“, изјави заменик-гувернерот на Народната банка на Кина, Лу Леи.
Пекинг планира да го прошири бројот на билатерални валутни своп-аранжмани и порамнувањата во национални валути, како и да ја подобри инфраструктурата за прекугранични плаќања. Кина исто така сака да ја зголеми прекуграничната употреба на дигиталниот јуан и плаќањата преку QR-кодови.
Кинеските власти интернационализацијата на јуанот ја гледаат и како начин за намалување на зависноста од финансиските канали базирани на американскиот долар, особено кај меѓународните плаќања и финансирањето.
Кина во последните години ја зголемува употребата на јуанот преку билатерални договори, валутни своп-аранжмани и развој на инфраструктура за прекугранични плаќања. Во исто време, Пекинг ги поттикнува трговските партнери да користат национални валути во меѓусебната трговија и инвестициите.
Хонг Конг треба дополнително да ја зацврсти својата позиција како главен офшор центар за јуанот, додека Кина планира да го поддржи развојот на пазарите во Лондон, Сингапур и Дубаи. Шангај, пак, треба да ја зајакне својата улога како глобален центар за инвестиции и управување со ризик поврзан со средства деноминирани во јуани.
Сепак, аналитичарите оценуваат дека патот на јуанот до статусот на глобална резервна валута и понатаму е долг. Американскиот долар и натаму има доминантна позиција во глобалниот финансиски систем, додека Кина одржува строга контрола врз својот капитален пазар.
И покрај тоа, Пекинг продолжува постепено да ја проширува меѓународната употреба на својата валута, особено во земјите каде што кинеската трговија и инвестиции имаат значително присуство.
