Економијата на еврозоната во вториот квартал од 2026 година оствари подобар резултат од очекувањата, покажуваат најновите податоци. Наместо забавување, бруто домашниот производ (БДП) на еврозоната порасна за 0,4 проценти во однос на претходниот квартал, додека економијата на Европската Унија забележа раст од 0,5 проценти.
На годишно ниво, економскиот раст во еврозоната достигна еден процент, што укажува на отпорност и покрај енергетските потреси предизвикани од конфликтот меѓу САД и Иран и продолжената геополитичка неизвесност.
Најголем придонес за растот даде Ирска, чиј БДП се зголеми за дури 3,9 проценти во вториот квартал. По неа следуваат Литванија со раст од 1,7 проценти и Шведска со 1,4 проценти.
Меѓу најголемите европски економии, најдобри резултати бележи Шпанија со квартален раст од 0,7 проценти, поттикнат од силната домашна потрошувачка, извозот и инвестициите во обновливи извори на енергија.
Германија, најголемата економија во Европа, забележа раст од само 0,2 проценти, главно благодарение на извозот, додека инвестициите и домашната потрошувачка остануваат слаби. Ист раст од 0,2 проценти остварија и Франција и Италија, додека Белгија и Австрија стагнираа.
Во меѓувреме, инфлацијата повторно почнува да расте. Во Германија таа во јули достигна 2,7 проценти, а во Шпанија 3,5 проценти. Доколку овој тренд продолжи и на ниво на еврозоната, Европската централна банка би можела повторно да размислува за зголемување на каматните стапки по летниот период.
