Амбицијата не треба да биде само пазар на капитал што функционира, туку пазар што расте, ги претвора заштедите во инвестиции и на кој граѓаните му веруваат, компаниите го избираат, а инвеститорите сакаат да останат, порача Претседателката на Комисијата за хартии од вредност, м-р Бујаре Абази, на 25. Годишната конференција на Македонската берза во Охрид.
Абази истакна дека македонскиот пазар на капитал се наоѓа во период на значајна регулаторна и развојна транзиција, во која усогласувањето со европските стандарди треба истовремено да обезбеди сигурност и доверба, но и да создаде простор за иновации и поголема динамика на пазарот. „Пред нас е двоен предизвик: од една страна, мораме да изградиме регулаторна рамка која гарантира сигурност и доверба, а од друга страна да поттикнеме иновации и динамика на пазарот“, нагласи Абази.
Според неа, еден од клучните предизвици е активирањето на домашниот пасивен капитал. Граѓаните и компаниите располагаат со значителни заштеди, а задачата на институциите и на пазарните учесници е да создадат услови дел од тие средства да препознаат дополнителни можности за инвестирање преку пазарот на капитал. Абази посочи дека пазарот на капитал не треба да се гледа како конкурент на банкарското кредитирање, туку како негово неопходно надополнување, особено при финансирањето на поризични и иновативни проекти и обезбедувањето дополнителни извори на капитал за малите и средните претпријатија. Осврнувајќи се на европската интеграција, Претседателката на КХВ нагласи дека усогласувањето со ЕУ не смее да значи слепо наметнување административен товар, туку воспоставување поедноставни, појасни и пропорционални правила кои ќе ги намалат трошоците за учесниците, а истовремено ќе го зачуваат интегритетот на пазарот.
Таа го истакна и приклучувањето на КХВ кон регулаторна иницијатива заедно со седум земји членки на Европската Унија, оценувајќи дека тоа отвора можност за поинтензивна размена на искуства и усогласување на регулаторните практики. Абази информираше и дека, со поддршка од Министерството за финансии и во соработка со берзанската заедница, се подготвени новите преодни одредби за претстојното усогласување на овластените учесници со новиот Закон за финансиски инструменти, чија примена започнува следната недела. Според неа, новата законска регулатива треба да биде основа за следната развојна фаза на македонскиот пазар на капитал – транспарентен, интегриран и атрактивен за домашните и странските инвеститори и способен да понуди нови инструменти за финансирање на економијата.
Претседателката на КХВ повика на силно партнерство меѓу регулаторот, Министерството за финансии, овластените учесници, компаниите и инвеститорите, нагласувајќи дека развојот на пазарот е заедничка одговорност.
„Целта не треба да биде само пазар што функционира. Нашата амбиција мора да биде пазар што расте. Пазар што ги претвора заштедите во инвестиции. Регулативата во доверба, а довербата во развој“, порача Абази.
