Иако германските власти и бизнис лидерите постојано ја нагласуваат итната потреба од увоз на квалификувана работна сила, новите официјални податоци на Сојузната агенција за вработување покажуваат големи разлики во платите на странските работници во Германија.
Најголемо изненадување е тоа што вработените во Германија со полно работно време се наоѓаат дури на шестото место според висината на платата, додека работниците од пет странски земји заработуваат значително повеќе од домашните работници.
Вработените со полно работно време во Германија имаат просечна бруто-месечна плата од 4.396 евра. На врвот на листата се работниците од Индија, со 5.445 евра бруто месечно, односно дури 1.049 евра повеќе од германските работници.
Следуваат работниците од Тајван со 5.395 евра, од Кина со 5.065 евра, од Египет со 4.563 евра и од Белорусија со 4.533 евра месечно.
Високите примања на стручњаците од Индија и азиските земји се поврзуваат со високото ниво на квалификации, особено во секторите на информатичката технологија, инженерството и медицината.
Уделот на работниците со ниски примања во овие групи е релативно мал. Кај работниците од Тајван, само 7 отсто заработуваат помалку од 2.811 евра месечно. Кај кинеските работници тој удел изнесува 10,8 отсто, а кај индиските 13,1 отсто. За споредба, кај германските работници уделот е 12,3 отсто.
На спротивниот крај од листата се работниците од земји од кои во последните години пристигна голем број бегалци. Нивните плати се за повеќе од 1.500 евра пониски од оние на германските работници.
Работниците од Сомалија во просек заработуваат 2.798 евра месечно, од Ирак 2.804 евра, од Авганистан 2.817 евра, од Сирија 2.822 евра, а од Украина 2.825 евра.
Кога ќе се земат предвид сите странски работници во Германија, нивната просечна месечна заработка изнесува 3.358 евра, што е за 1.038 евра помалку во споредба со германските работници.
Разликата дополнително се зголемила во однос на 2024 година, кога изнесувала 973 евра.
Статистиката покажува и дека околу 70 отсто од сите странски работници со полно работно време заработуваат помалку од германската просечна плата, додека 30,6 отсто од странските вработени спаѓаат во категоријата работници со ниски примања.
