Трговската војна со САД предизвика силен бран на економски патриотизам во Канада, а се поголем број граѓани свесно избегнуваат американски производи и бараат домашни алтернативи. Откако американскиот претседател Доналд Трамп повторно ги зголеми царините за дел од канадските производи, канадската влада сè поотворено ги повикува граѓаните да купуваат домашни производи и со својата потрошувачка да им дадат поддршка на канадските компании.
„Можеме и мораме да избереме да купуваме канадско“, порача канадскиот министер за финансии Франсоа-Филип Шампањ, нагласувајќи дека потрошувачката на домашни производи не само што врши притисок врз САД, туку и ги штити работните места во Канада. Министерката за индустрија Мелани Жоли исто така ги повика граѓаните да ги поддржат домашните производители.
Промената во однесувањето на потрошувачите веќе се забележува во продавниците. Купувачите сè почесто проверуваат од каде потекнува производот и избираат канадски производи дури и кога се поскапи. Во продавниците се појавуваат сè повеќе ознаки со канадскиот јаворов лист, со кои јасно се истакнува домашното потекло на производите. Според неодамнешно истражување, околу 40 отсто од канадските купувачи на намирници активно го проверуваат потеклото на производите и се обидуваат да избегнат стока произведена во САД.
Бојкотот особено го погоди американскиот алкохол. Американските вина и жестоки пијалаци веќе се повлечени од полиците во повеќето канадски провинции, додека во Саскачеван, кој сè уште продава американски алкохол, продажбата паднала за околу 40 отсто. Провинцијата најави и 50 отсто царина за американскиот алкохол од 8 септември.
Економскиот отпор не се ограничува само на купувањето. Канаѓаните значително го намалија и патувањето во САД. Во текот на 2025 година бројот на патувања на Канаѓани во САД паднал за околу 25 отсто, а потрошувачката на канадските туристи во САД се намалила за милијарди долари. Иако во 2026 година има одредено закрепнување, бројот на патувања и понатаму е значително под претходните нивоа.
Во меѓувреме, трговскиот конфликт продолжува да се продлабочува. Канада најави контрамерки за американски производи во вредност од околу 20 милијарди долари, со царини од 15 до 50 отсто, кои треба да стапат во сила на 8 септември. Мерките опфаќаат стотици американски производи, меѓу кои челик, електроника, облека, храна, земјоделска опрема и други производи.
Иако канадската влада тврди дека целта е да се заштитат домашните компании и работните места, економистите предупредуваат дека долготрајната трговска војна може да има цена и за канадските потрошувачи, преку повисоки цени и зголемени трошоци за компаниите. Канада е особено зависна од американскиот пазар, бидејќи околу 70 отсто од нејзиниот извоз оди во САД.
Сепак, засега политичкиот ефект е спротивен од очекуваниот: наместо да ги подели Канаѓаните, трговскиот конфликт со Вашингтон поттикна пошироко чувство дека домашната економија треба да стане помалку зависна од САД. Владата на премиерот Марк Карни сè почесто зборува за диверзификација на трговијата и отворање нови пазари, додека кампањата „Купувај канадско“ станува еден од највидливите симболи на отпорот кон американската царинска политика.
