Повисоките цени на енергијата поради војната во Иран до крајот на годината би можеле да ги зголемат трошоците на шпанската индустрија за 7,4 милијарди евра, проценува здружението на производители „Сојуз за конкурентност на шпанската индустрија“.
Сметките за гас ќе се зголемат за дополнителни 4,2 милијарди евра, а трошоците за електрична енергија за 3,2 милијарди евра, пресметале во шпанското индустриско здружение.
Околу 70 отсто од дополнителните трошоци ќе бидат концентрирани во периодот од септември до декември.
Затоа здружението ја повика владата да ги продолжи постојните мерки за поддршка и да воведе дополнителни мерки за заштита на производството, инвестициите и работните места.
Многу од мерките што моментално се во сила истекуваат во последните месеци од годинава.
Кризата дополнително ги продлабочи постојните проблеми со конкурентноста, објаснува портпаролот на сојузот Карлос Рејноcо, додавајќи дека производителите не можат сами да ги преземат дополнителните трошоци за енергија.
Од почетокот на септември, мегават-час електрична енергија на физичкиот пазар во просек чинеше речиси 150 евра, што е повеќе од двојно повисока цена во споредба со истиот месец минатата година, кога изнесуваше 61 евро.
Цените на гасот во Европа овој месец надминаа 80 евра за мегават-час, достигнувајќи го највисокото ниво од декември 2022 година.
Цената на барел нафта, пак, надмина 100 долари по неодамнешните напади врз саудиската енергетска инфраструктура и континуираните нарушувања во поморскиот сообраќај низ Ормускиот теснец.
