Американското Федерално истражно биро (ФБИ) соопшти дека САД добиле судско одобрение за заплена или блокирање на криптовалути во вредност поголема од 1,2 милијарди долари, украдени во еден од најголемите хакерски напади во историјата на криптоиндустријата.
Станува збор за кражба на криптовалути во вредност од околу 6,3 милијарди долари од Binance, најголемата светска берза за криптовалути. Американските истражители претходно ја поврзаа операцијата со севернокорејската хакерска група TraderTraitor.
Според податоците на ФБИ, американските власти и приватниот сектор досега заедно замрзнале повеќе од 2,7 милијарди долари од украдените средства. Министерството за правда на САД во четвртокот соопшти дека судот одобрил заплена или блокирање на повеќе од 1,2 милијарди долари од тој износ.
Постапката за враќање на украдените средства е сложена. Американските власти вообичаено поднесуваат барање до судија за одземање на имотот, по што судот одлучува кој има законско право на средствата.
Во меѓувреме, ФБИ ја обвини Северна Кореја и за одделна операција со која, според американските власти, во изминатите 18 месеци биле украдени околу 400 милиони долари во криптовалути.
Операцијата го носи името FaceStealer и се базира на софистицирани техники на социјален инженеринг. Методите вклучувале преземање популарни апликации за комуникација, како и употреба на видеоснимки генерирани со вештачка интелигенција, односно deepfake технологија, за измама на жртвите.
Американските власти подолго време ја обвинуваат Северна Кореја дека преку хакерски напади и други нелегални активности на интернет обезбедува финансиски средства за државата, вклучително и за нејзините воени и нуклеарни програми.
