Генералниот секретар на СДСМ, Миле Зечевиќ веќе не е дел од надзорниот одбор на Стопанска банка АД Битола. Бизнис365 изврши увид во официјалните документи на банката, каде измените се направени пред пет дена, иако Зечевиќ на 30 август поднесе оставка од функцијата.
Во оставка, Зечевиќ имаше наведено дека се повлекува од лични причини, а заради зголемени професионални обврски во останатите работни ангажмани и истата стапува во сила со денот на комплетирање на составот на Надзорниот одбор.
„Согласно член 73 од Статутот на Стопанска банка Битола, во случај на предвремено престанување на функцијата на член на Надзорниот одбор, на првата наредна седница на Собранието на Банката се вршат избори за испразнетите места за остатокот односно полниот мандат“, кажаа од Банката кога беше објавена оставката.
Оставката доаѓа во време кога Комерцијална банка АД Скопје и Стопанска банка АД Битола се уште ја разгледуваат можноста за присоединување, информација која беше споделена со јавноста уште во рана фаза.
Постапката, според информациите до кои дојде Бизнис365 е се уште необврзувачка, бидејќи се уште се разгледуваат инфомрациите и од едната и од другата страна. Посериозни информации за ова ќе има дури после усвојувањето на завршните сметки за 2023 година на двете банки на нивните Собранија во 2024 година.
