Заменик претседателот на Владата задолжен за економски прашања Фатмир Битиќи денеска на својот фејсбук профил напиша дека е згрозен од зголемувањето на сумата за задолжителна осигурителна полиса од страна на осигурителните компании. Според него, ова е манипулативен чин со кој осигурителните компании ја зголемуваат цената на авто осигурувањето на грбот на граѓаните.
-Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на владина седница. Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните, посочи Битиќи.
Тој го повика Министерството за финансии како и Комисијата за заштитата на конкуренција да постапат по овој случај.
-Го повикувам ресорното Министерство за финансии и Комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата, објави Битиќи на Фејсбук.
