Цените на авионските билети би можеле значително да пораснат следната година доколку цената на нафтата остане на сегашното ниво, предупреди Мајкл О’Лири, извршен директор на Ryanair. Наглиот раст на цените на авионското гориво создава притисок врз авиокомпаниите, пренесува CNBC.
Ryanair предупредува дека авионските билети следната година би можеле значително да поскапат по наглиот раст на цените на авионското гориво, кои се повеќе од двојно зголемени.
„Ако цените на нафтата останат високи и следната година, мислам дека ќе видиме значителен раст на цените на авионските билети и се надеваме дека ќе успееме да го избегнеме тоа“, рече О’Лири во пресрет на годишното собрание на компанијата.
Горивото за авиони достигна 195 долари за барел
Цената на нафтата Brent се движи околу 100 долари за барел поради стравувањата од ескалација на конфликтот на Блискиот Исток и можните последици врз снабдувањето со енергенси.
Растот на цените на нафтата значително ги зголеми и трошоците на авиокомпаниите. Цената на авионското гориво достигна речиси 195 долари за барел во неделата што заврши на 18 септември, што е двојно повеќе од просекот во претходната година, според податоците на Меѓународната асоцијација за воздушен транспорт (IATA).
О’Лири уште во април предупреди дека некои финансиски поранливи европски авиокомпании би можеле да имаат проблеми во текот на оваа година доколку високите цени на горивото станат сè потешки за поднесување.
Ryanair делумно заштитен со договори за хеџинг
Ryanair однапред ги обезбеди цените за значителен дел од потребите за гориво, со што засега е ограничено влијанието на растот на цените на пазарот.
Компанијата преку хеџинг-договори покри 80 отсто од горивото потребно за летната сезона. За 2027 година Ryanair обезбеди гориво по цена од 67 долари за барел, додека за 2028 година однапред се покриени само 15 отсто од потребите, по цена од 85 долари за барел.
Војната меѓу САД и Иран веќе влијаеше врз резултатите на компанијата. Профитот на Ryanair во првиот квартал падна за 34 отсто, откако избивањето на конфликтот на 28 февруари ги натера потрошувачите да ги одложат резервациите.
Компанијата тогаш ги намали цените на билетите за да ја поттикне побарувачката и не воведе дополнителни такси за гориво во текот на летната сезона, без оглед на движењето на цените на нафтата.
Ryanair најави значително намалување на бројот на летови за периодот од ноември 2026 до март 2027 година. Одлуката е мотивирана од забрзаниот раст на цената на авионското гориво, која се зголеми за околу 80 отсто, достигнувајќи просек од речиси 1.300 долари за тон.
Иако во август оствари рекорден број патници, повеќе од 22 милиони, со пополнетост на авионите од 96 отсто, ирскиот авиопревозник одлучи да ја намали годишната прогноза.
За фискалната година од април 2026 до март 2027 година, Ryanair сега очекува да превезе 214 милиони патници, во однос на првичната проекција од 216 милиони.
Главната цел е да се намали финансиската изложеност во текот на зимските месеци, кои традиционално се период на загуби за авиокомпаниите. Намалувањата ќе се однесуваат на помалку профитабилните линии и фреквенции на летови. Со намалувањето на понудата, Ryanair очекува да ги намали загубите за 70 до 100 милиони евра.
Покрај откажувањето на летовите, компанијата упати јасно предупредување до патниците: цените на билетите за кратките летови значително ќе пораснат доколку цената на нафтата остане на сегашното ниво.
Ryanair со финансиски инструменти покри 80 отсто од потребите за керозин до март 2027 година, но тој процент паѓа на само 15 отсто во следните 12 месеци.
Во тој контекст, компанијата предупредува дека конкурентските авиокомпании кои немаат слична финансиска заштита би можеле да се соочат со големи потешкотии во претстојната зимска сезона.
