Претставници на Синдикатот за индустрија, енергетика и рударство, денеска биле на преговори со новиот газда на поранешно ,,Фени” во Кавадарци. Оваа информација ја потврди Игор Ѓерасов, претседател на СИЕР. Преговорите следувале откако околу 133 работници кои први се вратени на работа по стечајот, одбиле да потпишат решенија за работа на неопределено време со плати од околу 24 илјади денари.
– Бевме на преговори за поголеми работнички права во поранешно ,,Фени”, комбинатот за фероникел што сега има турски сопственик. Одлучено е, овие два месеца да се продолжи да се работи со договор на дело, со зголемена исплата согласно ноќно работење, инфлација и стаж. Во рок од два месеца, повторно да се седне и да се разговара и преговара околу платите што ќе бидат со решенијата за вработување, појасни Ѓерасов.
На прашањето што е со враќањето на работа на останатите вработени, бидејќи некогашниот гигант пред стечајот имаше околу 800 работно ангажирани, тој рече дека ќе има постепено ангажирање во наредните два месеца. Новите газди, според него, планирале да стартуваат со производство околу први септември.
Ѓерасов информира дека првично времените вработувања ќе бидат преку Агенција за вработување, за после два месеца, како што било договорено, да се трансформираат во редовни вработувања.
– Дотогаш ќе формираме комисија за преговори околу платите, од менаџерскиот кадар, од синдикатот, човечки ресурси. Да се земат сите аспекти во предвид и да се постигне договор, подвлече претседателот на СИЕР.
