Со 9 гласа „ЗА“, Советот на Општина Кочани му додели мандат на независниот советник Венко Крстевски за вршител на должноста градоначалник на општината до локалните избори годинава. Крстевски доби поддршка од советниците на СДСМ, советничката од Левица гласаше воздржано, а неговиот против кандидат од советничката група на ВМРО –ДПМНЕ, Гоце Марков, освои 8 гласа.
По изборот за в.д. градоначалник, Крстевски се заблагодари за поддршката и нагласи дека во наредните шест месеци до локалните избори ќе работи на рехабилитација на градот по големата трагедија и поефикасно функционирање на институциите.
Именувањето на Крстевски за в.д. градоначалник дојде откако на почетокот на седницата советничката од ВМРО-ДПМНЕ Кристина Атанасова Арсова си поднесе оставка. Со солзи во очите, појасни дека приоритет во следниот период ќе ѝ биде да се грижи за нејзиното дете, кое е меѓу повредените од пожарот во дискотеката Пулс и сѐ уште е на лекување, но и да се посвети на давање поддршка на другите повредени во пожарот.
Иако дадоа поддршка за изборот на Крстевски за в.д. градоначалник, советниците од СДСМ искажаа подготвеност да не делуваат политички во следниот период и воопшто да не истакнуваат свои предлози за раководители на општинските институции и претпријатија. До градоначалникот доставија повеќе барања поврзани со трагедијата.
Кочани е без градоначалник откако претходниот, Љупчо Папазов, си поднесе оставка и заврши во притвор како осомничен за трагичниот пожар во дискотеката Пулс, во кој животот досега го загубија 61 лице, а околу 200 беа повредени.
