Синдикатот на работниците од угостителството, туризмот, комунално-станбеното стопанство занаетчиство и заштитните друштва на Македонија (СУТКОЗ) денеска потпиша Меморандум за соработка со партнерите од Италија, Бугарија и Малта како заокружување на проектот „Промовирање и зајакнување на социјалниот дијалог во секторот за води преку иновативни пристапи“. Четирите синдикати изминатите речиси две години заеднички работеа на проектот. Стекнаа нови вештини, но и знаења како преку иновативни начини да го подобрат социјалниот дијалог во секторот води.
Како што изјави претседателот на СУТКОЗ, Стојанче Кашиковски, проектот беше под покровителство на ЕУ, а неговата реализација е придонес на Синдикатот на работниците од угостителството, туризмот, комунално-станбеното стопанство занаетчиство и заштитните друштва во приближувањето на земјава кон ЕУ.
-Проектот беше за промоција и зајакнување на социјалниот дијалог во секторот води преку иновативен пристап. Нам и на нашите партнери од Македонија, Организацијата на работодавачи, ни беше особена чест што бевме вклучени во проектот кој е од особено значење зашто како претставници на работниците научивме нови вештини, дознавме многу нови начини на кои можеме да го подобриме социјалниот дијалог кој, пак, ќе придонесе за потпишување колективни договори со нашите социјални партнери на ниво на гранка или на ниво на работодавачи. СУТКОЗ е репрезентативен синдикат што го покрива доменот на јавните комунални претрпијатија во Македонија, е дел од нив се и водоснабдителните претпријатија. Склучувањето колективни договори ќе овозможи уредување на правата на работниците со нови практики и јакнење на социјалниот дијалог преку иновативни пристапи, истакна Кашиковски.
И носителот на проектот, Јордан Јорданов од Бугарија, ја нагласи важноста на проектот. Рече дека водоснабдувањето е исклучително битен сегмент во секоја од државите во Европа, особено поради климатските промени.
-Со Меморандумот ги дефиниравме следните чекори. Проектот не завршува денеска, денеска го направивме можеби првиот чекор во однос на нашето партнерство, меѓу синдикатите од Италија, Бугарија, Малта и Македонија, напомена тој.
