Седум членки на Европската Унија испратија заеднички предлог до Европската Комисија за воведување нови царини за одредени категории руска стока, чија вкупна вредност на увоз во 2024 година изнесуваше околу 5,4 милијарди евра.
Предлогот беше поддржан од Естонија, Финска, Германија, Латвија, Литванија, Полска и Шведска, според документ до кој дојде бриселскиот Политико.
Според предлогот, царините би опфаќале железо и челик, неоргански хемикалии и ѓубрива – производи кои остануваат на пазарот на Европската Унија и покрај обемните санкции воведени поради војната во Украина. Дипломатски извори наведуваат дека овие стоки ѝ обезбедуваат на Русија значителен приход од девизи што го поддржува финансирањето на војната.
Компаниите од Европската Унија минатата година купија руска стока во вкупна вредност од 33 милијарди евра.
Ако ги исклучиме енергетските производи од статистиката, годишната вредност на увозот е околу 11 милијарди евра и се однесува на метали, ѓубрива, алуминиум, риба и одредена механичка опрема. Овие категории не се целосно опфатени со санкции или имаат индивидуални исклучоци договорени на ниво на Европската Унија.
За разлика од санкциите, за кои е потребна едногласна поддршка од сите земји-членки, воведувањето царини може да се одлучи со квалификувано мнозинство.
Според „Политико“, поддршката на Германија претставува клучен пресврт, бидејќи најголемата економија во ЕУ не била секогаш подготвена да се приклучи на построгите трговски мерки досега.
Сепак, дел од членките се против овој предлог. Особено се издвојуваат Белгија и Чешка, кои имаат исклучоци за одредени видови челични полупроизводи поради фабриките во руска сопственост, како и Данска, која е во слична ситуација.
