Унгарските железници (MAV), покрај со Будимпешта, следната година со воз ќе го поврзуваат главниот град на Србија со Виена, потврдено е за порталот N1.
Долгоочекуваната железничка линија помеѓу Белград и Будимпешта, според најновите најави, треба да биде воспоставена напролет 2026 година.
Но, тоа не е сè – два воза дневно од Белград, според N1, ќе го продолжат своето патување надвор од унгарскиот главен град – до Виена. Во спротивна насока, од Виена до Белград, исто така ќе има две дневни заминувања.
Пред некое време, на веб-страницата на Железничката инфраструктура на Србија (IŽS) накратко се појави нацрт-распоред за возниот ред за 2025/26 година. Иако графиконите се однесуваат само на делот од железницата низ Србија, јасно е дека од Белград до Будимпешта ќе сообраќаат шест возови дневно и обратно. Три заминувања ќе реализира „Србијавоз“ (со нови брзи возови на кинескиот производител CRRC), а три унгарски МАВ.
Она што веднаш го привлече вниманието на љубителите на железничкиот сообраќај на интернет форумите е тоа што двата унгарски воза на MAV што ќе патуваат до Белград, како и двата што ќе патуваат до Будимпешта, имаат исти броеви како и возовите што моментално сообраќаат меѓу главните градови на Унгарија и Австрија.
N1 побара официјална потврда за воспоставување директна железничка линија меѓу Белград и Виена од Унгарските железници (MAV), Србијавоз и Министерството за градежништво, транспорт и инфраструктура на Србија, но дури и по еден месец, немаше одговор. Затоа, на крајот контактиравме со Австриските железници (OBB) и ги добивме бараните информации истиот ден, наведуваат од медиумот.
- Заедно со нашиот партнер MAV, планираме во иднина да ги лансираме возовите 144 и 148 меѓу Белград, Будимпешта и Виена. Во спротивна насока, возовите 141 и 147 ќе сообраќаат меѓу Виена, Будимпешта и Белград – изјавија од OBB.
ОББ потсетува дека овие возови моментално сообраќаат само помеѓу Виена и Будимпешта, како и дека датумот на започнување на директната линија до Белград сè уште не е утврден, но дека тоа треба да се случи во 2026 година, а патувањето преку Унгарија ќе трае 6 часа.
