Клубот на истражувачите на Народната банка денеска ќе ја одржи 52. сесија на која ќе биде презентиран трудот: „Дали платите го одразуваат растот на продуктивноста? – Споредба меѓу европскиот исток и запад“ од авторите Треновски, Б., Глигорич, Д., Кожески, К., Мерџан, Ѓ., информираат од Народната банка. По презентирањето на трудот e предвидена дискусија.
Клубот на истражувачите на Народната банка е отворена платформа за презентација и дискусија на научноистражувачки трудови, особено во доменот на монетарната политика и макроекономијата. Трудовите коишто се презентираат на сесиите на Клубот, треба да бидат изработени согласно со трендовите и стандардите на современите истражувања, што подразбира емпириска анализа, како и систематизирани заклучоци од истражувањето.
Од Народната банка велат дека на сесиите на Клубот како платформа за дискусија и размена на стручни мислења, може да се презентираат резултати и сознанија и од истражување/труд во работна верзија. Сесиите се од јавен карактер и фотографиите од настанот се објавуваат на веб страната на Народна банка и на профилите на социјалните мрежи.
