Пратеници од власта во консултација со Министерството за транспорт поднеле измени на Законот за јавни патишта, со кои, како што велат предлагачите, ќе се овозможи подобрување на патната инфраструктура и унапредување на сообраќајната безбедност во нашата држава.
-Денеска сакаме да ве информираме за важен чекор што го направивме во насока на подобрување на патната инфраструктура и унапредување на сообраќајната безбедност во нашата држава. Заедно со неколку пратеници и во консултација со Министерот за транспорт, господинот Александар Николоски и неговиот кабинет, поднесовме измени на Законот за јавни патишта. Ќе ги издвојам трите најзначајни новини од предложените измени – подобрување на безбедноста на патиштата, модернизација на системот за наплата на патарина, како и ослободување од патарина за специфични категории граѓани, рече на денешната прес-конференција пратеничката од ВМРО-ДПМНЕ Бети Стаменковска Трајковска.
Таа истакна дека во однос на подобрувањето на безбедноста на патиштата во предложениот закон се вклучува нова, појаснета дефиниција за експресен пат, што ќе овозможи подобро планирање и уредување на патната мрежа. Дополнително, нагласи таа, се проширува можноста за примена на мерки за забавување на сообраќајот на јавни патишта, во согласност со стандардите за сообраќајна безбедност – сè со цел да се намалат ризиците и да се заштитат сите учесници во сообраќајот.
Пратеничката Стаменковска Трајковска истакна дека со предложените измени во однос на модернизацијата на системот за наплата на патарина се предвидува воведување постпејд и припејд модели за наплата на патарина, како и можност за надополнување на електронските уреди – М-карта и М-таг – преку широка мрежа на малопродажни објекти низ целата држава. Целта, рече таа, е да се намалат гужвите на наплатните станици, да се зголеми ефикасноста и да се поттикне користење на електронски системи за плаќање.
Со измените се предвидува и ослободување од патарина за специфични категории граѓани.
-Социјалната димензија на овие измени предвидува ослободување од плаќање патарина за лицата кои имаат извршена трансплантација на орган или ткиво, како и за донори на органи или ткива. Веруваме дека ова е мал, но значаен чекор во насока на поголема поддршка и почитување кон овие лица, рече Стаменковска Трајковска.
Со овие измени, истакна таа, се поставуваат нови стандарди за безбедно, модерно и правично користење на патиштата во Република Македонија.
