Во Црна Гора, просечната цена по квадратен метар на стан во нова зграда за третиот квартал од 2025 година изнесувала 2.228 евра, објави денес локалниот Завод за статистика (Монстат).
Прелиминарната статистика ги вклучувала само становите што биле продадени за прв пат на пазарот, односно за кои за прв пат бил склучен договор за продажба, се додава во соопштението.
Просечната цена по квадратен метар во новоградбата во Подгорица изнесувала 2.153 евра, во крајбрежниот регион 2.458 евра, во северниот регион 1.578 евра, додека во централниот регион не е евидентирана продажба на станови во новоградбата.
Крајбрежниот регион ги вклучува градовите Бар, Будва, Херцег Нови, Котор, Тиват и Улцињ, додека централниот регион ги вклучува Цетиње, Даниловград, Никшиќ, Тузи и Зета.
Северниот регион ги опфаќа Андријевица, Беране, Бијело Поље, Гусиње, Колашин, Мојковац, Петњица, Плав, Пљевља, Плужине, Рожаје, Шавник и Жабљак, се наведува на веб-страницата Монстат.
