Обвинителството за гонење на организиран криминал заедно со МВР и Управата за финансиска полиција од утрово приведува неколку лица во Неготино, Кавадарци, Битола и Охрид, како осомничени во предистражната постапка „Синџир“, под сомнение дека сториле кривични дела против јавните финансии.
„Денеска од раните утрински часови под раководство на јавен обвинител од Основното јавно обвинителство за гонење на организиран криминал и корупција, Управата за финансиска полиција со асистенција на единиците од МВР на повеќе локации во Неготино, Кавадарци, Битола и Охрид извршува претреси и се приведуваат осомничени лица. Акцијата е резултат на повеќемесечна предистражна постапка, под кодно име „Синџир“, за кривични дела против јавните финансии, платниот промет и стопанството што обвинителството ја спроведе со Управата за финансиска полиција и истражители од Истражниот центар на Основното јавно обвинителство за гонење на организиран криминал и корупција“, велат од ОЈО.
Од таму посочуваат дека по завршување на акцијата, обвинителството детално ќе информира за предметот.
